Yfed a gyrru
Beth yw'r terfyn cyfreithiol?
Yn ôl y gyfraith, trosedd yw gyrru gyda mwy na 80 miligram o alcohol ym mhob 100 mililitr o waed.
Fodd bynnag, mae alcohol yn effeithio ar bobl wahanol mewn ffyrdd gwahanol, gan ddibynnu ar eu rhyw, eu pwysau, eu hoedran, pa mor gyflym maent yn yfed, faint a pha mor ddiweddar maent wedi bwyta, ac os ydynt wedi cymryd unrhyw gyffuriau eraill.
Mae hefyd yn bwysig cofio:
- Os ydych wedi bod allan yn yfed, gallwch fod dros y terfyn cyfreithiol y diwrnod wedyn
- Dim ond amser sy'n sobri chi - nid cawod oer, awyr iach, diod o ddwr, na choffi cryf!
- Os ydych yn gwybod fod rhywun yn gyrru, peidiwch â chynnig diod alcoholig iddynt
Gall hyd yn oed ychydig bach o alcohol amharu ar eich gallu i yrru, felly, yr ateb call yw:
OS YDYCH WEDI YFED UNRHYW ALCOHOL - PEIDIWCH Â GYRRU!
Sut mae alcohol yn effeithio ar eich gallu i yrru
Mae alcohol yn lleihau:
- Y gallu i ganolbwyntio
- Amser ymateb
- Rheolaeth dros gyhyrau a'r gallu i gydsymud
- Eglurder golwg ac ymwybyddiaeth
- Y gallu i amcangyfrif cyflymer a phellter
- Y gallu i ymdopi â'r annisgwyl
Gall hyd yn oed ychydig bach o alcohol amharu ar eich gallu i yrru:
Er nad ydych yn torri'r gyfraith efallai, gall yfed cyn lleied ag un uned o alcohol (h.y. hanner peint o lager) effeithio ar eich gallu i yrru. Ni fyddwch yn gallu amcangyfrif cyflymder cerbydau a'u pellter oddi wrthych. Ni fyddwch yn gallu gweld goleuadau sy'n symud yn iawn efallai, a byddwch yn fwy tebygol o gymryd risg, yn enwedig er enghraifft goddiweddyd mewn lle peryglus. Annoeth felly yw gyrru gyda hyd yn oed un uned o alcohol yn eich corff.
Ac, os ydych yn yfed mwy o alcohol na hynny:
Yn ogystal â thorri'r gyfraith, ni fydd eich llygaid yn gallu addasu i amodau golau sy'n newid, a ni fyddant yn sensitif i oleuadau coch (e.e. goleuadau brêc, goleuadau traffig). Byddwch yn dechrau dioddef o welediad twnnel, a bydd effaith sylweddol ar allu eich llygaid i ymateb i oleuni a thywyllwch. Gall y ffaith eich bod yn methu gweld pethau ymylol yn achosi i chi wrthdaro yn erbyn cerbydau sydd wedi'u parcio. Bydd dirywiad o safbwynt eich sylwgarwch mewn perthynas â beicwyr, cerddwyr, polion a cherbydau eraill. Byddwch yn goramcangyfrif eich gallu, a ni fyddwch yn gallu asesu pellter yn gywir. Bydd effaith difrifol ar eich gallu i ganolbwyntio, a bydd amhariad ar eich amser ymateb, felly mewn argyfwng byddai angen llawer mwy o amser arnoch i stopio. Efallai y byddwch yn cael problemau mawr wrth drin eich car. Byddech yn berygl go iawn i chi'ch hunan ac i unrhyw un arall ar y ffordd unrhyw le'n agos i chi.
MAE HYN OLL YN GOLYGU EICH BOD LLAWER MWY TEBYGOL O GAEL DAMWAIN.
Mae'n bwysig cofio nad chi yw'r unig un sy'n cael ei effeithio gan yfed a gyrru. Gallwch hefyd achosi niwed ofnadwy i fywydau pobl eraill.
Does dim esgus dros Yfed a Gyrru:
Yn lle hynny, gallwch:
- Gymryd eich tro i yrru
- Archebu tacsi
- Defnyddio cludiant cyhoeddus
- Aros dros nos
Cyswllt gwybodaeth
Mae'r bas data ar asiantaethau'n cynnwys manylion cyswllt mudiadau fydd efallai yn gallu cynnig gwybodaeth neu gymorth ar y pwnc yma.
Chwilio'r bas data »
Seilir yr wybodaeth ar y dudalen hon ar y ffynonellau canlynol (gyda'u caniatâd caredig):
- "Alcofacts: A Guide to Sensible Drinking" a gynhyrchwyd gan The Health Promotion Division, 1999
- www.roadsafetyuk.co.uk
